Tuesday, August 16, 2016

सिंधीयिन जे वाधारे जूं रुकावटूँ ?

आम तौर सिंधीयिन जी दान्ह आहे त असां जी कौम उहा तरकी न कयी आहे।   भारत में असां सिंधीयिन खे उहो मुकाम न मिलियो आहे जहिं जा असां हक़दार आहियूं ? अचो त डिसूं त १९४७ - २०१६ जे विच में मुल्क जी वडी माली ताकत जो रुतिबो हासिल कन्दड सिंधी कौम जे वाधारे जूं मुख्य रुकावटूँ कहिड़ीयूँ रहियूं आहिन।
[१]  भाषा : असां सिंधी बोलीअ खे सिर्फ विचारन जी जाण [डे वठु ] जो साधन समझी सिंधी बोलीअ ते ध्यान न डिनो आहे।  हकीकत में भाषा समाज जे तहजीबी [Cultural], अदबी [Literary] ऐं सामाजिक वाधारे जो साधन बि आहे जहिं ते ध्यान न डियण सबब सिंधी भाषा ऐं नतीजे तौर सिंधी कौम जे वाधारे में रूकावट पैदा थी आहे।
[२] लिपीअ जो झगड़ो : अरेबिक ऐं देवनागिरी लिपि जे झगडे सबब अदबी वाधारो न थी संघियो आहे।  साहित्य समाज जो आइनो लेखियो वेन्दो आहे पर जे आइनो ई न हुजे त समाज जी जेका हालत थिये थी सा असांजे सामहूं आहे।
[३] तमाम घणियूं संस्थाऊँ : सिंधी कौम जे वाधारे में इन्हन बि रूकावट जो कमु कियो आहे छो जो इन्हन में सिर्फ पाण खे रहबर डेखारिण जी चटा भेटी हले पयी।
[४] होसिला अफ़ज़ाई जी घटितायी : - जेके बि शख्स या संस्थाऊँ सिंधी कौम जे वाधारे वास्ते कमु करण शुरू कन था उन्हन मां जेके बि कमु बंद कन था जे उन जो सबब डिसजे त आम तौर हिकु आहे समाज पारां मुनासिब सहयोग त परे पर ठीक ठाक नमूने जी होसिला अफ़ज़ाई बि हासिल कोन थिये।
[५] सिर्फ पाण खे सही या बेहतर समझण ;- सिंधी कौम खे भारत में नयें सिर पाणु वासायिणो हो मतलब मुख़्तलिफ़ खेतरन में सुधार जी ज़रूरत हुयी ऐं अजु बि आहे। असां जे समाज वट अलग अलग खेतरन में कमु कन्दड शख्स ऐं संस्थाऊँ आहिन ऐं काफी सुठो कमु बि थिये पियो पर मुसीबत इहा आहे जो इन्हन मां हर को पहिंजे कम खे वधीक अहमियत वारो समझी बिये खे न सिर्फ घटि थो लेखे पर उन जे कम खे घटि अहमियत वारो या मागे बिना ज़रूरत वारो कमु डेखारिण जी कोशिश कन था।  नतीजे तौर आम सिंधीअ जे विशवास में घटितायी अचे थी ऐं हू इन्हन सुधारन खां पाणु परे करण जी कोशिश करे थो।
[६] शख्सी सतह : हाणे जे असां शख्सी सतह ते विचार कयूं त हित बि असां जो अहम आडो अची सिन्धियत जे वाधारे जी राह रोके बिहे थो। मुहिंजी बिलकुल ताज़ी यादगिरी मुखे बुधाये त कीअं उत्तर भारत जूं समाज सेवा में नामवर ऐं पाण खां वधीक सिंधी समाज खे अहमियत डियण वारियूं ब शख्सियतूं खसीस व्हाट्सएप्प ग्रुप में पहिंजी हैसियत या अहमियत घटिजण जो खियाली खियाल करे पहिंजे अहम खे चोट रिसाये वेठियूं ऐं नतीजे तौर हिक बिये खे पहिंजे व्हाट्सएप्प ग्रुप मां रिमूव करे पाण खे बिये जे व्हाट्सएप्प ग्रुप खां धार करे छडियो। हाणे सोचियो उन्हन जे इन अहम जे टकराव जो नुकसान त सिंधी समाज खे थियो न ? छो जो बिन्ही जी सलाहयतुन जो कुछ हिसो इन गालिह में अजायो पियो खरचु थी रहियो आहे त बियो उन बाबत व्हाटसअप ते छा लिखी रहियो आहे ?  जे इहो अहम जो टकराव टारिण मुमकिन हुजे हां त इहे सालाहियतूं, वकतु ऐं उन्हन जी गड़ियल सघ सिन्धियत जे वाधारे वास्ते वधीक असरायिते नमूने कम अची सघे हां।