सिन्धु देश - सिन्धियन जे मसैलन जो खात्मो ?
मुहंजे लाय इहा गाल्ह नईं हकीकत सां वाकिफ थियण खां घट न आहे त भारत जा सिन्धी बी अलग सिन्धु देश जी घुर में शामिल आहिन , कच्छ अं राजस्थान जी जैसलमेर जहिडियन एराजियन खे मिलाये हिक अलग सुबो सिन्धु देश अड़ीयण चाहिन था | शायद इनिहन खे महसूस थिए थो त अलग राज्य मिलण सां सिन्धी बोली अं सिन्धी सभ्यता जे विरसे खे कायम रखण में असरायती मदद मिलंदी पर शायद असां खे इहो याद नथो रहे त भारत में सिन्धियन जी अजोकी खास नमूने जी आदमशुमारीअ सबब अलग सिन्धु देश मिलन सां बी को फर्क पवण वारो न आहे छो जो कानून त अलग सुबो थाहे दीन्डो पर उते सिन्धी घनयाई में त कोन हुंदा न ? अजु भारत में सिन्धी कश्मीर खां कन्याकुमारी ताईं हर हंद ते मोजूद आहिन पर कंहीं बी हिक हंद ते सिन्धियन जी आदमशुमारी ऐतेरी कोन आहे जो मुल्क या ऐराजीअ जी सियासत ते असर करे सघे, भारत में जामुहरियत आहे जहींमें हुकूमत लाय घनियाई हुअण लाजमी आहे |
छा असां इहो समझूँ था त अलग सिन्धी सूबों मिलन सां भारत जे अलग अलग शहरन जा सिन्धी लड़े उते वेन्दा ? जे इहो तस्वुर आहे त माफ़ कंदा इहा हकीकत न पर हिक सुहनों सपनो आहे जेको हकीकत में बदलजण ओतिरो ई दुखियो आहे जेतिरो सिज जो ओभर बद्रां ओल्ह मां उभरण | असां खे याद रखण घुरिजे त सिन्धी कोम धंधो कन्दड कोम आहे अं असां जे लाय धंधो सभ खां वडी अहमियत रखे थो | छा असां चाहियुं था हिक भेरो वरी सिन्धी कोम पहिन्जा धंधा छड़े हिक नईं जगह ते नयें माहोल में माली तौर थान्यिकी थियण लाय जफकाशी वारे दौर खे मुंह दिए ? छो जो अलग सिन्धी सूबों ठहन जो मतलब त इहो ई थीन्दो न त भारत जे बियन शहरन मां सिन्धी अची उते रहन |
भारत में अलग सिन्धी सूबे जी घुर करण खां अगु असां लाय इहो लाजमी आहे त असां किन जमीनी हकिकतुन खे ध्यान में रखूं | इहो सचु आहे त भारत में सिन्धी माली तौर ताकतवर कोमुन मां हिक हुँदै बी सियासी तौर का बी अहमियत न था रखन पर इहो शायद इनकरे आहे जो असां सिन्धी आदमशुमारी मुजीब किथे बी घनयाई में न आहियुं जेका जमुहरियत में सियासी तौर असरदार थियण जी पहरीं अं तमाम ज़रूरी शर्त आहे | अलग सूबों मिलण ते बी सियासी तौर सिन्धी असरदार थियण तद्हीं मुमकिन आहे जदहिं उन सूबे में सिन्धियन जी आदमशुमारी वधिक हुजे हित सवाल इहो आहे त इहो मुमकिन आहे छा ? जे इहो मुमकिन न आहे त पोई अलग सिन्धी सूबे जी घुर बेमानी आहे |
हित मां हिक आजमुदो तव्हां जी नज़र कयां थो , उल्हासनगर मां कोल्हापुर अचंण वक़्त ट्रेन में उल्हासनगर जे किन सिन्धी व्यापारियन सां मुलाकात थी , सन्दन किन गाल्हिन जो घट में घट मूं वट त को ज़वाब कोन हो , छा जे असां सिन्धी बोली वापरईंदासीं त असां जी ज़मीन जायदाद जो अघु वधी वेंदो ? जे सिन्धी बोली खत्म थी रही आहे त छा असान्जा धंधा बंद थी वेन्दा ? असां जे धंधे करण जी क़ाबलियत सिन्धी बोलीअ जे वापर सां त लागापो न थी रखे ? असां जे बारन खे सिन्धी बोली न अचंण जो मतलब इहो त कोन्हे त उनिहन खे धंधे करण जो अकुल बी कोन्हे ?
इहा हकीकत आहे त भारत जे विराहंगे जी वध में वध कीमत सिन्धी कोम खे चुकईनी पयी आहे पर भारत में सिन्धियन जी अजु जी खास नमूने जी आदमशुमारी बी हिक हकीकत आहे , इहा बी हिक हकीकत आहे त सिन्धियन लाय इहो मुमकिन न आहे त अजु जीते हू थानियिका थिया आहिन उन शहर मां लडूपल्लाणु करे कहीं बिये नए शहर में थानियिका थियण जी कोशिश कन|
रहियो सवाल सिन्धी बोली अं सिन्धी सभ्यता जे विरसे खे कायम रखन जो त मुहंजो हिक सवाल उन्हन सभनी सिन्धी अगुवानन लाय आहे जेके इन सिमत में कम पिया कन अं हरदम ज़ाहिर पिया करण चाहियन त सिन्धी बोली जी उनिहन खे तमाम घणी चिंता आहे , इहो सुवाल आहे त इहे अगुवान पूरी ईमानदारीअ सां पहिन्जो पाण खे जवाब डियन त पहिन्जे घर में पहिंजन बारन सां कहिड़ी बोलीअ में गाल्हियाईंदा आहिन ? जे असां पाण सिन्धी बोली नथा वापरियुं त पोई असां खे सिन्धी बोलीअ बाबत कुछ बी चवण जो या सोचीण जो कहिडो हक्कु आहे ?
चवण जो मतलब त असां सिन्धियन खे हकीकत समझण घुरिजे इहो हाणे मुमकिन कोन्हे त भारत में असां सिन्धियन खे अलग सूबों मिले पर हां इहो ज़रूर मुमकिन आहे त असां सिन्धी भारत में पन्हीजी टिदिअल पख्दिअल आदमशुमारी खां पोई बी सियासी तौर ताकतवर बनंजी सघुं था | इन लाय इहो ज़रूरी आहे त अखिल भारत सतह ते असां सिन्धी यकसां नज़र अचुं | भारत में जमुहरिअत आहे अं असां सिन्धियन खे कोशिश करण घुरजे त देश अं राज्य जी लोकसभा अं विधानसभा लाय सिन्धी ऐवजी वडे तादाद में इलेक्शन में खटी अचन जन्हीं लाय असां जी घुर हूअण घुरिजे त हिक त सिन्धियन खे थोरायी वारियन कोमुन में शामिल कियो वन्ये अं बियो लोकसभा अं हर हिक राज्य जी विधानसभा में के सीट्स सिन्धियन लाई महफूज़ रखन घुरिजन |
